Saturday, January 16, 2021
Home Blog

Sulmohet nga Mediat Kosovare iniciativa Du Me Votu

0

Reagim pas sulmeve përmes publikimeve të lajmeve të rreme nga portalet “Indeksonline”, “Kosovapress”, “Klan Kosova”, “T7“, etj.

Shoqata jonë është informuar që portali “Indeksonline” ka publikuar emrin e nismës sonë. Në atë publikim theksohet që Komisioni Qendror i Zgjedhjeve (KQZ) ka reaguar ndaj kësaj nisme duke thënë se kjo platformë është e paautorizuar, në kundërshtim me ligjin dhe dëmton integritetin e procesit zgjedhor. Më pastaj, shumë prej portaleve të tjera e kanë shpërndarë atë lajm të rremë. Asnjë portal nuk na kontaktoj dhe nuk është bërë asnjë hulumtim siç e parasheh etika e gazetarisë.

Ky lajm nuk është vërtetuar askund. KQZ-ja nuk ka bërë asnjë reagim zyrtar deri më tani.

Portali “Indeksonline” ka publikuar po ashtu profilet e Facebook-ut të dy personave që shfaqin logon “Du Me Votu” dhe në këtë mënyrë ka shkelur të drejtën e privatësisë dhe integritetit të personalitetit sipas nenit 164 të Kodit civil të Republikë së Kosovës.

Edhe pse këto lajme nuk janë të vërteta, shoqata jonë dëshiron të reagojë ndaj këtyre sulmeve që synojnë ta diskreditojnë atë.

Fillimisht, ia vlen të theksohet se kjo shoqatë pajtohet me nenin 60 dhe nenë të tjerë në vijim të Kodit civil zviceran. Qëllimi i kësaj shoqate është promovimi i pjesëmarrjes politike. Prandaj qëllimi në planin afatgjatë është përmirësimi i dukshmërisë, transparencës dhe shkëmbimit të informacioneve lidhur me politikën në Kosovë. Kjo është një iniciativë qytetare, apartiake dhe jo-fitimprurëse, e cila synon të përmirësojë pjesëmarrjen e drejtpërdrejtë në demokraci dhe është në përputhshmëri të plotë me nenin 45 pika 3 të Kushtetutës së Republikës së Kosovës sipas të cilit, “institucionet shtetërore mbështesin mundësitë për pjesëmarrjen e çdonjërit në aktivitete publike dhe të drejtën e secilit për të ndikuar në mënyrë demokratike në vendimet e organeve politike”. Aktualisht, Kosova po hyn në një garë të re elektorale dhe Komisioni Qendror i Zgjedhjeve të Kosovës (KQZ-ja) ka vendosur një afat për aplikimin në listën zgjedhore për diasporën. Ky afat është caktuar nga 13 deri më 21 janar 2021.

Duke pasur parasysh kompleksitetin e procesit të aplikimit për diasporën dhe mungesën e informacioneve nga organet shtetërore lidhur me këtë proces, kemi marrë iniciativën të ndihmojmë në këtë proces.

Mënyra se si ndihmojmë në këtë proces është e thjeshtë dhe nuk bie në kundërshtim me asnjë ligj. Përmes kësaj platforme, ne mbështesim vetëm hapat e parë dhe lehtësojmë shkarkimin e formularit. Në asnjë mënyrë nuk duhen regjistruar informacionet e ndjeshme sikur numri personal i pasaportës, data e lindjes ose nënshkrimi. Ato duhet të plotësohen me dorë pas shkarkimit dhe shtypjes së formularit. Po ashtu, duke u bazuar në ligjet zvicerane dhe statutet e shoqatës Du Me Votu, të dhënat nuk mund të ndahen në asnjë rastë me një palë të tretë. Kjo platformë është vetëm një mjet lehtësues për plotësimin e formularëve të aplikimit, nuk është në asnjë mënyrë mundësi alternative për regjistrim. Për shkak se përdoruesi, për të votuar, detyrimisht duhet të printojë formularin e gjeneruar në format PDF dhe më pas ta dërgojë KQZ përmes email adresës personale, nuk ka ndërhyrje në proces.

Këto portale po ashtu akuzojnë shoqatën si të dyshimtë sepse kërkon donacione. Fillimisht, duhet të sqarohet që platforma jonë për përdoruesit është pa pagesë. Programimi i platformës është bërë nga një kompani profesionale zvicerane, e cila punon sipas standardeve më të larta botërore sa i përketë sigurisë kibernetike. Meqenëse është bërë nga një kompani profesionale dhe e besueshme në Zvicër, kjo shkaktoi kosto të larta për ne. Për t’i mbuluar ato kosto të larta, na nevojiten pra donacione, sidomos duke marrë parasysh që shoqata jonë është e përbërë nga studentë me resurse financiare të kufizuara. Ia vlen t’iu rikujtojmë këtyre portaleve bazat e një demokracie pjesëmarrëse. Du Me Votu është një nismë qytetare, e krijuar nga studentë shqiptarë në Evropë. Në të gjitha vendet demokratike, ekzistojnë iniciativa qytetare të cilat kërkojnë donacione. Kjo është tërësisht e ligjshme sepse donacionet e ndihmojnë funksionimin e demokracisë. Qëllimi është pjesëmarrja e qytetarëve e cila është, mbi të gjitha, një aspekt i dialogut midis institucioneve dhe komuniteteve shoqërore që çon në vendime që krijojnë kapital shoqëror.

Sinqerisht,
Shoqata Du Me Votu

Zürich, 15.01.2021

Stafi i Kryeministrisë në Grevë

0

Në vazhdim gjeni njoftimin nga këshilli Grevist

Ju njoftojmë se mbi gjysma e zyrtarëve të Zyrës së Kryeministrit dhe zyrtarë të ish Ministrisë së Integrimit Evropian kanë hyrë në Grevë më 14 janar 2021 dhe kanë vazhduar atë ditën e sotme.

Kërkesa e vetme e grevistëve është: Anulimi i Rregullores 01/2020 për Organizimin e Brendshëm dhe Sistematizimin e Vendeve të Punës në Zyrën e Kryeministrit.
Kjo Rregullore është duke u kundërshtuar për shkak të shkeljeve ligjore të cilat kanë ndodhur gjatë procesit të hartimit të saj. Grevistët e vlerësojnë se kjo Rregullore përbën shkelje të shumta procedurale dhe materiale të legjislacionit në fuqi.

Greva do të vazhdojë deri në Anulimin e Rregullores 01/2020 për Organizimin e Brendshëm dhe Sistematizimin e Vendeve të Punës në Zyrën e Kryeministrit.

Me nderime, Këshilli Grevist

ETEA, ORCA DHE QHPSM: REAGIM NDAJ PARALAJMËRIMEVE TË SBASHK PËR GREVA

0

Organizata ETEA, Organizata për Rritjen e Cilësisë në Arsim (ORCA) dhe Qendra për Hulumtime Psiko-Sociale dhe Mjekësore (QHPSM) shprehin indinjatën e thellë mbi leximin e gabuar të situatës në arsim nga Sindikata e Bashkuar e Arsimit, Shkencës dhe Kulturës (SBASHK), veçanërisht në raport me kërcenimet për hyrje në grevë në rast se nuk bëhen pagesa shtesë prej 100 EUR në muaj për mësimdhënësit.  

ETEA, ORCA dhe QHPSM qëndrojnë prapa kërkesave legjitime për paga më të dinjitetshme në të gjithë sektorët, përfshirë këtu edhe në sektorin e arsimit. Në këtë linjë, SBASHK, sikurse çdo organizim tjetër sindikal që mbronë të drejtat e punëtorëve dhe synon të avancojë interesat përkatëse, ka të gjitha të drejtat për kërkimin e plotësimit të kushteve materiale, kërkimin e mundësive për avancimin e tyre dhe për trajtimin e barabartë të sektorit të arsimit me sektorët e tjerë të prekur nga pandemia. Por, kjo nuk mund të bëhet duke e rrezikuar edhe më tej mbarëvajtjen e procesit mësimor dhe është krejtësisht e papranueshme që të bëhet në dhe mbi kurriz të nxënësve dhe studentëve.

ETEA, ORCA dhe QHPSM vlerësojnë që SBASHK-u duhet t’i prioritizojë interesat e nxënësve dhe studentëve dhe në asnjë rrethanë të mos i përdorë si mjet për plotësimin e kërkesave, e sidomos në rrethanat aktuale ku nxënësit dhe studentët janë një ndër grupet shoqërore më të goditura nga masat e ndërmarra për frenimin e pandemisë COVID-19.

Është e vërtetë dhe tërësisht zhgënjyese që të gjitha Qeveritë e pasluftës në Kosovë e kanë lënë arsimin në situatë të mjerueshme, ku si rrjedhojë, pothuajse në secilin vlerësim ndërkombëtar nxënësit kosovarë performojnë dukshëm më dobët krahasuar me nxënësit e shteteve tjera. Por pavarësisht kësaj, mësimdhënësit kosovarë janë më të kënaqurit në botë me punën e tyre, përkatësisht 94% e mësimdhënësve shprehen shumë të kënaqur me profesionin e tyre (TIMSS, 2019), gjë që është kontradiktore me kërkesat për rritje të vazhdueshme të pagave nga SBASHK. Për më tepër, kërkesa për rritje pagash para se gjithash duhet të korrespodojnë me performancën e nxënësve dhe cilësinë në arsim.

Në këtë drejtim dhe në këto rrethana pandemike, paralamjërimet për grevë në kushte të pandemisë dhe situatës politike në të cilën ndodhet vendi, e dëmtojnë edhe më tej sistemin arsimor në Kosovë. Prandaj, para se të merret ndonjë vendim nga SBASHK, bëjmë thirrje që të gjendet kompromisi dhe të shqyrtohen forma e mundësi të tjera për t’i shtyer përpara kërkesat e sindikatës, pa dëmtuar procesin mësimor dhe instrumentalizuar nxënësit që edhe ashtu pothaujse në çdo vit bëhen viktimë e betejave mes SBASHK dhe institucioneve vendimmarrëse.

Veton Tusha do të luaj në Denizlispor në Turki

0

Sot është nënshkruar kontrata profesionale për 3 vite e gjysëm me lojtarin 18-vjeçar nga Kosova Veton Tusha i cili po stërvitet me ekipin A të Denizlispor që nga fillimi i sezonit.

Veton Tusha luante në pozitën e sulmuesit në përfaqësuesen e Kosovës.

Ekipi Denizlispor mban vendin e 20 në Ligën e Turkisë.

Shumë suksese nën uniformën e gjelbër e zi Veton! 💚🖤

URIME KOSOVË, mashtrimet e PLAN bashkuan forcat e dijës!

0

shkruan Avni Abazi, New York

Avni Abazi

Një bashkim forcash i pritur dhe i paralajmrum që nga mocioni i LDK-s për rrezimin të Qeverisë Kurti.

Shumë e kuptuëshme me pas një si lloj feste tek taborret (mbeshtetsit) e të dy lidereve, por sulmet e ulta nga kundërshtarët politik definitivishte veç sa e madheshtojnë këtë bashkim forcash.

Megjithatë, shumë intersant se si ish VV-istet, tani PSD-ja, pa përjashtim, këtë bashkim po e quajnë “shfrytezim” nga ana e Kurtit të Zonjës Osmani për vota, deri sa LDK-istat po thonë se Vjosa po e mashtron, gjegjsishtë shfrytezon Kurtin për qellime politike.

PDK-ja s’po i ndan hiq! Po i sulmon të dyte dhe po done me kriju çeshtje kerkesën e Hoxhës për debat me Kurtin, derisa AAK-ja sikur mban heshtje rreth bashkimit të tyre por e gjunë topin të presidenti.

Fatkëqsishtë, mashtrimet e juve LDK, PDK dhe AAK i kanë ba bashkë këta të dytë. E juve qe iu denoj vota qytetare me 6 tetor shfrytezoni edhe pak ditë studiot telivizive e pritni tjere qe qytetari ka me i denu me 14 shkurt, sidomos do LDK-ista që vrapuan pas Grenell dhe agjentave të ndarjës se Kosovës.

Në mbeshtetje të plotë të këtij bashkimi të natyrshem për udheheqjen e popullit të Kosovës në sfidat e dekadës se njerzve t’dijës. URIME KOSOVË

Të respektohet Ligji për Barazi Gjinore për përfaqësim të barabartë 50%

0

Agjencia për Barazi Gjinore (ABGJ) e Republikës së Kosovës, ju përkujton subjekteve politike, të cilat garojnë në fushatën elektorale për zgjedhje parlamentare Shkurt 2021, respektimin dhe zbatimin e Ligjit për Barazi Gjinore të Kosovës neni 6-të, pika (8-të)  për përfaqësim të barabartë gjinor në të gjitha organet legjislative me përfaqësim 50 % (përqind)  për secilën gjini.

Agjencia ju përkujton subjekteve politike se një përfaqësim i barabartë gjinor në vendim-marrjen politike e legjislative të vendit është reflektim dhe zbatim i drejtpërdrejtë si dhe jetëson Kushtetutën e Kosovës sipas së cilës:  “Republika e Kosovës siguron barazinë gjinore si vlerë themelore për zhvillimin demokratik të shoqërisë, mundësi të barabarta për pjesëmarrje të grave dhe burrave në jetën politike, ekonomike, sociale, kulturore dhe në fushat të tjera të jetës shoqërore.”

Barazia gjinore, e reflektuar përmes pjesëmarrjes së barabartë 50% për secilën gjini është  vlerë themelore për ndërtimin e një shoqërie demokratike. Parimi i 50%  duhet të përshkojë listat zgjedhore për përfaqësim të barabartë duke respektuar masën afirmative, programet e partive politike me propozime konkrete për pjesëmarrje, përfaqësim dhe zhvillim të barabartë dhe cilësor mes gjinive, fuqizimin socio-ekonomik të grave, dhe nxitjen e pjesëmarrjes në votime të grave dhe burrave në Kosovë.

Po ashtu ABGJ rikujton se ne zbatim te LBGJ  ne përpikëri  50%  se ne momentin e formimit te Kuvendit kuota gjinore nuk zbatohet ne ato kandidate gra te cilat i kane siguruar votat e tyre, por nga kandidatja e pare grua ( brenda çdo partie politike)  e cila nuk ka vota te mjaftueshme,  ne mënyrë qe përbërja e Kuvendit te reflektoi përfaqësim prej 50%.

Për të arritur barazinë e vërtetë gjinore dhe për të gëzuar të drejta të plota njerëzore, ndryshimet duhet të jenë konkrete, të shpejta, vendimtare, të dukshme dhe gjithëpërfshirëse, prandaj duhet të kontribuojnë të gjithë që të shënojmë progresin që na detyron korniza ligjore e Kosovës dhe ardhmja Evropiane të cilën synojmë.

Parimi i përfaqësimit të barabartë prej 50 % për secilën gjini po ashtu duhet te reflektohet edhe në trupat mbikëqyrëse të zgjedhjeve – Komisionet Komunale Zgjedhore dhe Këshillat e vendvotimit.

Gjithashtu subjektet politike duhet të angazhohen plotësisht në sigurimi dhe përkrahjen financiare të fushatës së kandidateve gra në mënyrë të barabartë sikurse dhe për kandidatët burra, në përputhje me Ligjin për Barazi Gjinore, Ligjin për Financimin e Partive Politike dhe Ligjin Për Zgjedhjet në Republikën e Kosovës.Agjencia për Barazi Gjinore ju përkujton subjekteve politike që gjatë fushatës elektorale në gjuhën e përdorur në takime me elektoratin, programet dhe premtimet elektorale, materialet promovuese të subjekteve politike të evitojnë gjuhën seksiste, të dhunshme, dhe stereotipet gjinore.Agjencia për Barazi Gjinore ju bën thirrje mediave që të ofrojnë hapësirë të barabartë për  gratë kandidate që të shpalosin programin e tyre. Paraqitja mediale është e rëndësisë së veçantë në fushatë zgjedhor, sidomos tani në situate pandemie kur mundësia e qasjes ndaj elektoratit mbështetet kryesisht në prezantim mediatik . Hapësira mediale duhet të jetë e qasshme dhe transparente për të gjithë kandidatët pa dallim gjinie.

Ndërtimi i një shoqërie me vlera demokratike që punon për harmoninë shoqërore përmes promovimit të vlerave dhe parimeve të barazisë gjinore, i kontribuon paqes dhe mund të arrihet vetëm përmes konsensusit, dialogut, respektit për diversitetin e mendimit, përkatësisë ideologjike, gjinore, etnike e kulturore, respektimt të të drejtave dhe lirive të individit.

Po ashtu, rikujtojmë se bazuar në Ligjin për Barazi Gjinore – 2015, Neni 5 pika 2, thekson se: Çdo dispozitë, e cila është në kundërshtim me parimin e trajtimit të barabartë sipas këtij Ligji shfuqizohet.

Regjistrimi i popullsisë në Republikën e Maqedonisë së Veriut

0

Nga Skender Musliu

Skender Musliu

Qeveria e Republikës së Maqedonisë së Veriut (RMV) ka paraparë që gjatë muajit Mars dhe Prill të këtij viti do t’a bëjë regjistrimin e popullsisë, por paraprakisht duhet t’a miratojë Ligjin për regjistrim, i cili ndodhet në procedura parlamentare.

Prandaj duke u nisur nga kjo logjikë që i takon së kaluarës, së paku, që nga Lufta e Dytë Botërore, në të gjitha regjistrimet e popullsisë është manipuluar me numrin real të shqiptarëve. Kjo politikë manipulative me numrin e shqiptarëve vazhdon, madje me vrazhdësi edhe më të madhe, të aplikohet në RMV që nga pavarsia e saj, duke zvogëluar numrin real të shqiptarëve për qëllime dhe përfitime politike, në dobi të maqedonëve.

Se sa paraqet regjistrimi një proçes politik në Maqedoni, tregon fakti se regjistrimi i popullsisë në vitin 2011 vetëm pas dy javëve, me vendim politik, u ndërpre sepse sipas të gjitha gjasave numri i regjistrimit fillestar ua prishte « matematikat » politikanëve, madje për këtë dështim të qëllimshëm ende zhvillohet një proçes gjyqësore. Po ashtu, në këtë kontekst, për abuzimin e numrit të shqiptarëve dhe politikat antishqiptare flet fakti se në Maqedoni, sot e asaj dite, ka mbi 100 mijë shqiptarë pa nënshtetësi të kësaj Republike, të cilët nuk kanë të drejtë vote, punësimi, sigurim shëndetësor, asistencë sociale, kurse personave me prejardhje maqedone që jetojnë në Amerike, Australi, Zelandë të Re e gjetiu, ua japin shtetësine edhe pse ndoshta nuk e flasin maqedonishten dhe nuk e dinë se ku gjindet RMV.

Shteti maqedon aq e ka përpunuar dhe vështirsuar infrastrukturën juridike dhe procedurat për marrjen e shtetësisë, saqë ate e ka bërë të pamundur edhe pse shqiptarët kanë lindur apo jetojnë në Maqedoni 50 – 60 vite, që vlenë vetëm për shqiptarët e jo edhe për maqedonët.

Të gjitha dështimet në afirmimin dhe ngritjen e pozitës të shqiptarëve, diskriminimi i të drejtave dhe manipulimi i numrit të shqiptarëve, është si rezultat i regjistrimit sistematik të manipuluar nga maqedonët, prandaj tani kur Ligji për regjistrim është në procedura parlamentare, lidershipi shqiptar, pozitë dhe opozitë, duhet të jenë njëzërit për nxjerrjen e një Ligji jodiskriminues duke eliminuar të gjitha zgjidhjet manipulative të gjertanishme dhe inkorporimin e mekanizmave teknik dhe profesional për një Ligj pragmatik në të mirën e të gjithë qytetarëve.

Diskriminimi do të ishte edhe më dramatik nëse shqiptarët që jetojnë më shumë se një vit jashtë Maqedonisë, do të konsiderohen si popull joresident, që nuk është rast për maqedonët, e mbit ë gjitha kur dihet mirë se numri i shqiptarëve që punojnë jashta Maqedonisë është i konsiderueshëm.

Andaj është momenti i fundit që, jo vetëm partitë politike shqiptare, por edhe shoqëria civile dhe intelektualët të përfshihen në amandamentimin e këtij Ligji, në të kundërtën pasojat do të jenë të pariparueshme dhe afatgjata. kryesore bie mbi BDI-në që fatkeqësisht shquhet si parti e cila nuk i mbanë premtimet, si parti e shantazhuar nga korrupcioni, që spjegohet edhe me kohëzgjatjen e saj në pushtet me partitë maqedone duke bërë koalicion pa kurfar kushtesh në korriz të shqiptarëve. Edhe pse BDI-ja lavdërohet për të arriturat e shqiptarëve në RMV, por kjo më tepër është rezultat i kontributit të ndërkombëtarëve sesa i BDI-së, ngase këto janë të arritura kolaterale karshi atyre substanciale, siç janë barazimi i statusit juridik dhe politik i shqiptarëve me maqedonët me Kushtetutë, zyrtarizimi i gjuhës shqipe, ndarja proporcionale e Buxhetit të shtetit…..

Nëqoftëse nuk aprovohen kërkesat konstruktive dhe reale të partive politike shqiptare për miratimin e Ligjit për regjistrim, ndër të cilat është pët t’u përshëndetur puna e Aleancës për Shqiptarët dhe Alternativës, atëherë partitë politike shqiptare në pozitë duhet të dalin nga koalicioni qeverisës. Mirëpo duke u nisur nga e kaluara, vështirë se BDI-ja do t’a bëjë një gjest të tillë, sepse fatkeqësisht ajo është parti e shantazhuar dhe e kapur nga partitë politike maqedone.

 

MENGELET E TË MENDUARIT PARTIAK PO E DËMTOJNË KONTINUITETIN E ZHVILLIMIT

0
Mehmet PRISHTINA

Sido që të shkojnë zgjedhjet, Kosova dhe shqiptarët kanë nevojë për një tip Senati të njerëzve të pavarur partiakisht, por me përgatitje solide intelektuale e profesionale, të cilët do të detektonin nevojat dhe agjendat kombëtare për një periudhë të ardhshme kohore ku dilemat e partive dhe të politikës shoshiten në sitën e mendimit kompetent shkencor.

Kosova sërish ndodhet para një mejdani zgjedhor, dhe sërish partitë politike do të kërkojnë vota për të siguruar mandatin e radhës në Parlament.

Zgjedhjet në demokraci i ngjasojnë procesit të transfuzionit të gjakut. Për organizmin e njeriut ky proces është jetik, kurse për një shoqëri zgjedhjet paraqesin mundësinë ideale për të vënë në sprovë  grupe e individë me ide që mund të jenë novatore dhe krejt ndryshe nga stili pararendës i politikbërjes.

Një pyetje që shtrohet shpesh është nëse zgjedhjet vërtetë janë një shans më tepër për njerëzit me ide novatore, apo ato zgjasin agoninë e një shoqërie, duke forcuar oligarkitë politike dhe klanet e ndryshme të biznesit, të afërt me kupolën e pushtetit.

Në fakt, një prej testeve që vihen në shprehje në zgjedhje është pikërisht politika kadrovike, mirëpo te ne asnjëherë nuk ka ekzistuar një konsensus shoqëror e politik për kornizat e mundshme të kësaj politike. Kjo për arsye se te ne politika kadrovike më tepër është kuptuar si  trofe në duart e atyre që marrin pushtetin përmes aktivistëve dhe militantëve, por jo edhe përmes njerëzve të dijes dhe pragmatizmit intelektual.

Një defekt që përcillet nga një pushtet në tjetrin, nga njëri mandat në tjetrin, është sidomos paaftësia politike për të tejkaluar formatin e ngushtë partiak të njerëzve që vendosen në vende udhëheqëse, duke anashkaluar kuadrot të cilët vijnë nga fusha të ndryshme, që jo domosdoshmërisht duhet të jenë militant partiak. Sepse në demokracitë e zhvilluara, kuadrot përzgjidhen në bazë të rezultateve të punës dhe të karrierës, madje edhe nëse ata dalin në pension. Këta të fundit madje shfrytëzohen si këshilltar dhe ekspertë për konsulenca të ndryshme në institucione të ndryshme të sigurisë, drejtësisë, ekonomisë e gjetiu.
Kush në Kosovë mendon për këtë kategori kuadrosh me përvojë, të cilët pas pensionimit ata janë të detyruar të luajnë rolin e gjyshërve të parakohshëm, ndërkohë që shoqëria ka nevojë për trurin dhe përvojën tyre.

Duke ikur nga kjo metodologji e shëndetshme kadrovike, drejtuesit politikë te ne kanë instaluar njëfarë fryme të mitizimit të personaliteteve, të cilët gjatë gjithë kohës e mbajnë kokën në retrovizorin e historisë, duke u ushqyer me lavdinë e së kaluarës,  dhe si të tillë ata jo vetëm që e shkëpusin kontaktin me realitetin, por bëhen pengesë edhe për prurje të reja. Kjo ndodhë nga shkaku se te ne ende funksionon slogani famëkeq i “kuadrove të pazëvendësueshëm”, prandaj njerëzit më tepër marrin pjesë në zgjedhje për të dënuar një parti politike, se sa për të mbështetur ndonjë opsion të ri.

Zhgënjimi dhe përvoja negative është bërë pjesë e pandashme e afiniteteve të votuesve, te të cilët partitë kanë mbytur shpresat, ndërkohë që në shoqëri ka plot heronj të heshtur, por ata vazhdojnë të margjinalizohen nga kadrovikët e partive politike. Heronj të tillë, vendorë dhe ndërkombëtarë, nuk është vështirë të gjesh, sepse ata kanë bërë dhe bëjnë punë kolosale, por ata nuk i kap radari partiak.

Mirëpo askush sot nuk i llogarit pasojat nga një mendësi e tillë e mbrapsht, e cila burimin e ka në injorancë dhe mosrespektim të kuadrove, sidomos nga stafi ndërkombëtar, të cilët kanë luajtur rolin e këshilltarëve dhe konsulentëve profesionalë nëpër institucione të ndryshme të sistemit të drejtësisë, të sigurisë, të inteligjencës etj.

E keqja nuk qëndron domosdoshmërish në tërheqjen e ndërkombëtarëve nga këta sektorë të ndjeshëm, por te paaftësinë e këtyre institucioneve për të siguruar vazhdimësinë e punëve me ritmin dhe cilësinë paraprake, duke përgatitur kuadro që do të zëvendësonin ekspertët ndërkombëtare dhe që do të liroheshin nga ngjyrimet partiake.

Ka rrezik që në periudhën që pason, si rezultat i këtyre politikave të përçudnuara kadrovike,  pikërisht në prag të zgjedhjeve ku ka vakuum të pushteteve, të  ndodhë të tërhiqen disa kuadro amerikanë nga Institucionet prokuroriale të  Kosovës, nga Ministria e Brendshme  dhe për pasojë mund të instalohet një anarki institucionale në segmentet më vitale të shtetit, siç mund të jenë Prokuroria Speciale, Sektori i krimeve ekonomike në MPB dhe AKI, i cili aktualisht drejtohet nga një ushtrues detyre.
Produkt i një avarie të tillë sistemore  mund të jetë në radhë të parë abuzimi me pavarësinë institucionale, ku mund të vijë në shprehje amnistia e shkelësve të ligjit nëpër dikastere të ndryshme, për arsye se amnistitë e tilla burimin e kanë në gjyqësinë e kontrolluar nga partitë politike, por edhe në mungesën e një gazetarie të mirëfilltë hulumtuese në Kosovë.

Zgjedhjet e 14 shkurtit mund të mbyllin dhe të hapin dilema, për aq sa votuesit do të jenë të motivuar për të zgjedhur opsionet dhe individët me vizione dhe me guximin e ndryshimit rrënjësor të situatës.

Por sido që të shkojnë zgjedhjet, Kosova dhe shqiptarët kanë nevojë për një tip Senati të njerëzve të pavarur partiakisht, por me përgatitje solide intelektuale e profesionale, të cilët do të detektonin nevojat dhe agjendat kombëtare për një periudhë të ardhshme kohore ku dilemat e partive dhe të politikës shoshiten në sitën e mendimit kompetent shkencor.

Prishtinë, 12 janar, 2021

Fitorja ka ndodhur, Zgjedhjet do ta vërtetojnë me 14 Shkurt

0
Albin Kurti

Sot Albin Kurti dhe Vjosa Osmani mbajten një konferencë të përbashkët me rastin e nënshkrimit të bashkepunimit të tyre e cila ishte planifikuar të mbahej pranë shtatorës së Skenderbeut mirëpo për shkaqe të reshjeve të borës ajo u mbajt në hollin e kuvendit të Kosoves.

Marrëveshja në mes të Vjosa Osmani dhe Albin Kurti nënkupton se do të garojnë me një listë të përbashkët në zgjedhjet e 14 Shkurtit mësuam nga deklarata e Albin Kurti.

Bora u Vonua por Pranvera do të jetë e Hershme

Albin Kurti 14 Janar 2021

Marrëveshje e parimeve dhe synimeve politike, për nje shtet me drejtësi dhe pa korrupsion, për shoqëri me shëndet, punësim e arsim për të gjithë qytetaret pa dallime diskriminime apo favorizime tha më tutje Albin Kurti.

Referundumi është për fatin e brezave të rinjë të cilët dëshirojnë të jetojnë në një Kosovë më të mirë.

Vjosa Osmani synon postin e Presidentit

Vjosa Osmani

Rreth qështjes së presidentit Vjosa Osmani tha se rezultati i zgjedhjeve do ta vendosë edhe themelimin e Qeverisë edhe Zgjedhjen e Presidentit të Kosovës.

Ajo vazhdoi duke theksuar se ata synojnë bashkimin rreth një kauze që ka synim një të ardhme më të mirë për të gjithë qytetarët tanë. Për dy dekada vendi jonë është udhëhequr nga një mendësi politike e gabuar theksoi Vjosa Osmani.

Albin Kurti në pergjigje të gazetarëve theksoi se Ky vit është vit historik dhe do ta vendosë 14 Shkurti, në mbrëmjen e vonë të 14 shkurtit do të kuptohet numri i shumicës së deputeteve që do ta arrijmë, nuk mund ta parashikoj saktesisht por mund të iu garantoj vullnetin tim për ndryshime u pergjigje Kurti.

Videon nga Konferenca mund ta gjeni këtu:

https://www.facebook.com/watch/?v=469111764085209

Hoti: Nesër formohet Fondi Emergjent për sanimin e dëmeve nga vërshimet

0

Kryeministri në detyrë i Republikës së Kosovës, z. Avdullah Hoti, bashkë me ministrin e Mbrojtjes, z. Anton Quni dhe ministren e Financave, znj. Hykmete Bajrami, ka zhvilluar një takim virtual me kryetarët e komunave, ku është diskutuar lidhur me dëmet e shkaktuara nga vërshimet dhe ndihmën që mund të ofroj Qeveria në sanimin e tyre.

Kryeministri Hoti ka kërkuar nga kryetarët e komunave, që sa më parë të formojnë Komisionet Komunale, për vlerësimin e dëmeve nga vërshimet, ndërsa ka paralajmëruar se në takimin e radhës të Qeverisë në detyrë, i cili pritet të mbahet nesër, do të formohet edhe Fondi Emergjent, ku nga rezervat shtetërore do të ndihmohen komunat në sanimin e dëmeve që kanë shkaktuar vërshimet e ditëve të fundit.

Kryeministri Hoti ka qartësuar se dëmet të cilat janë shkaktuar në infrastrukturën publike dhe në tokat bujqësore, do të kompensohen sipas procedurave të rregullta përmes ministrive të linjës. Ndërsa Fondi Emergjent, do të ketë prioritet sanimin e dëmeve në ekonomitë familjare, me prioritet familjet me gjendje më të rëndë socio- ekonomike.

Edhe në këtë takim, kryeministri Hoti i ka përgëzuar për punën e tyre të jashtëzakonshme Kompaninë për Operacione Civile të FSK-së, Njësitet e Ekipeve të Zjarrfikësve dhe të Shpëtimit, ekipet e Xhenios, Agjencinë e Emergjencave dhe Shtabet Lokale, të cilat pandërprerë janë në terren në mbikëqyrje të situatës dhe ofrim të ndihmës për qytetarët dhe familjet e prekura nga vërshimet.

Përndryshe sot prej orës 14:30 kryeministri Hoti, bashkë me kryetarin e Komunës së Kamenicës, Qëndron Kastrati, do të qëndroj në fshatin Koretin, për të parë nga afër dëmet të cilat i kanë shkaktuar reshjet e ditëve të fundit. Kamenica është në mesin e komunave të cilat kanë pësuar dëme të konsiderueshme si në infrastrukturën publike ashtu edhe në toka bujqësore, si dhe ekonomi familjare.