DardaMEDIA

“3 Gjermanët e trashë II”

admin — Fri, 20 Apr 2012 15:34:37 +0000

E martë, 24.04.2012, ora 20:00

“3 Gjermanët e trashë II”

Prodhim i Teatrit ODA

Autor: Lirak Çelaj

Regjia: Florent Mehmeti

Muzika: Artan Bakija
Fotot: Lulzim Bejta
Skenografia:Petrit Bakalli

Luajnë:
Naser Rafuna
Adrian Morina
Kushtrim Sheremeti
Lirak Çelaj
Fisnik Ademi
Ard Islami
Arta Selimi
Florent Mehmeti

Janë kthyer përsëri, jo në Kosovë por në Veri, Jo si UNMIK por si BEeeee.
Tani me mision të ri. Për të ndalur ngrohjen globale,për të gjetur Korr upsionin dhe Mimozën. Ahhhhh Mimozë Mimozëëëëëë.
Në shfaqjen më të re “Tre Gjermanët e Trashë II” mund të ndiqni:
Çka tha Brigeli kur kërkoi për të pirë?
Pse Hansi nuk e la të pijë mohito?
Si e shijoi Ganiu borën e 21 të?
A është vërtetë Vukashini Ukshin?
A punon ende KFOR-ja për KFOR-in apo vetëm e dashuron?
Si i shkrinte Hekurani vezët në pikë të Polit të Veriut?
Këto dhe ngjarje të tjera ndiqni në “3 gjermanët e trashë II”
“3 Gjermanët e trashë II” shfaqja më e guximshme shqiptare.

Fjala e deputetes Alma Lama në Konferencën për media mbi Kodi i ri penal

admin — Fri, 20 Apr 2012 15:29:08 +0000

Miratimi i nenit 37 dhe 38 të Kodit Penal i cili ka të bëjë më lirinë e mediave përbën një shkelje të rëndë të kësaj lirie. Në fakt sot deputetët e Kuvendit të Kosovës me këtë ligj instaluar shtetin diktatorial i cili shantazhon lirinë e mediave, të gazetarëve redaktorëve, kryeredaktorëve, botuesve etj.
Së pari, Neni 37 që titullohet: Përgjegjësia penale e kryeredaktorëve, botuesve, shtypshkronjës ose prodhuesve, në pikën e parë të këtij neni thuhet: “Autori i informacionit është penalisht përgjegjës nëse vepra penale është kryer përmes publikimit të informatës në gazete ose në lloj tjetër të shtypit periodik, radio, televizion, internet ose mjete tjera të komunikimit.” Neni në fjalë vazhdon me pika të tjera ku parashikohet ndëshkimi i zinxhirit drejtues në media deri tek përgjegjësi në shtypshkronjë.
Në tërësinë e tij ky nen nuk specifikon se çfarë veprash penale mund të kryhen nëpërmjet medias, duke lënë kështu një hapësirë aq të madhe interpretimi, sa asnjë gazetar nuk do të mund ta ndjente veten komod në ushtrimin e profesionit të tij, e as të mbrojtur pas publikimit të informacioneve. Në fakt neni 42 i Kushtetutës së Kosovës është i qartë për sa i përket lirisë së mediave por edhe kufizimeve të saj. E kufizimet kanë të bëjnë me atë që Neni 146 i këtij kodi penal e adreson si “Nxitja e urrejtjes, përçarjes ose mosdurimit kombëtar, racor, fetar apo etnik”. Kjo do të thotë se nëse dikush nxit urrejtje fetare, etnike, racore ndëshkimi i tij është deri në 5 vjet burg.
Po kështu me nenin 38, pika 2 sot kuvendi i Kosovës i mundësoi organeve të rendit dhe drejtësisë të detyrojnë gazetarët që të nxjerrin burimet e tyre, duke u vështirësuar punën që në të ardhmen të publikojnë materiale që nuk i shkojnë për shtat qeverisë dhe pushtetit.
Edhe në Evropë Gjykata evropiane për të Drejtat e njeriut, në vitin 1996 në rastin Goodwin kundër Mbretërisë së Bashkuar vendosi që mbrojtja e burimeve nga gazetarët është një nga kushtet kryesore të lirisë së mediave. Gjykata vendosi se pengimi I kërkesa themelore të interesit publik do të ishte shkelje e nenit 10 të Konventës Evropiane për të Drejtat e Njeriut.
Edhe pse në kodin penal të Kosovës kërkohet nxjerrja e burimit për të “parandaluar sulmin që përbën kërcënim të pashmangshëm ndaj jetës apo integritetit trupor të ndonjë personi dhe disa vepra të tjera penale të përmendura më sipër, liria e gazetarëve cënohet në një njëjtën mënyrë pasi nuk është puna e tyre as ajo e policit as ajo e hetuesit. Në rast se ka marrë një informacion “në besim”ai duhet t’i qëndrojë besnik burimit dhe të kryejë vetëm misionin e tij, informimin. Mbrojtja e burimit në përgjithësi, pavarësisht nga rastet specifike është në interes ë publikut.
Pasojë e këtij neni mund të jetë burgosja e gazetarëve në të ardhmen në rast se ata nuk i nënshtrohen diktatit të gjyqësorit.

Kjo është shkelje e nenit 10 të Konventës Evropiane për të drejtat e njeriut, dhe është në kundërshtim të plotë më lirinë e medias dhe e kushtetutës së Kosovës e cila e garanton lirinë e mediave.

PDK në panik, presion mbi punëtorët shëndetësor

admin — Fri, 20 Apr 2012 15:25:08 +0000

Të enjten, më 19 prill 2012, rreth orës 10:00 në Qendrën Klinike të Mjekësisë Familjare (QKMF) në Ferizaj punëtorët shëndetësor dhe pacientët e kanë përjetuar presionin dhe shantazhin e llojit të vet, që di ta ushtrojë vetëm Partia Demokratike e Kosovës.

Në orar të punës, motra kryesore medicinale e kësaj qendre mjekësore, Selvije Bislimi në bashkëpunim me drejtorin e saj, të dirigjuar nga Shtabi i PDK-së, me një listë të punëtorëve të QKMF-së në dorë, i bënte presion secilit punëtor individualisht që të vi në një takim të PDK-së.

Ajo shënonte me plus ata që i bindeshin shantazhit dhe konfirmonin pjesëmarrjen, dhe me minus ata që nuk bindeshin, por që donin të merreshin me detyrën e tyre, që është shëndeti i qytetarëve.

Pengimi i punës së stafit të QKMF-së dhe rrezikimi i shëndetit të qytetarëve nga kjo ndërhyrje për Lëvizjen VETËVENDOSJE! janë të papranueshme. Mirëpo kjo është formë tipike e veprimit të PDK-së. PDK njeh vetëm shantazhin, presionin, korrupsionin dhe hajninë.

Por qytetarët e Ferizajt po i denoncojnë pikërisht këto forma kriminale të veprimit. Qytetarët e Ferizajt nuk shantazhohen. PDK-ja që po tenton ta shtyp vullnetin e qytetarëve për të mbetur në pushtet, është sot më shumë se kurrë në panik nga humbja.

admin — Wed, 18 Apr 2012 22:32:49 +0000

rona nishliu

Në kuadër të fazës së promovimit të këngës së saj ‘Suus’, Rona Nishliu është duke vazhduar me vizitat e saj nëpër vende të ndryshme. Pas Podgoricës, përfaqësuesja e Shqipërisë në Eurosong ka udhëtuar drejt Bukureshtit (Rumani), me qëllim të pjesëmarrjes në emisionet televizive në kuadër të televizioneve Antena 1, TV Rumania si dhe TVR1.

Kjo javë nuk mbyllet vetëm me këtë vizitë, meqë Rona do të paraqitet edhe në koncertin tradicional ‘Eurovision in Concert’, i cili, më 21 prill, organizohet në Amsterdam të Holandës.

Triumfi në festivalin tradicional të këngës shqiptare i ka mundësuar këngës ‘Suus’ rrugëtimin drejt Baku-së, në Azerbajxhan, ku, në garën e madhe të këngës europiane, Rona do ta perfaqësojë Shqipërine. Në këtë festival prestigjioz Rona Nishliu do të paraqitet në gjysmëfinalen e parë, më 22 maj, ndërkaq, sipas shortit, ajo këndon e pesta me radhë.

“Sikur kjo të ishte shfaqje”

admin — Wed, 18 Apr 2012 22:25:00 +0000

Teatri O|da

Bashkëprodhim i Teatrit ODA

dhe kompanisë teatrore LA RREMË

Bazuar në dramën e Almir Imshireviq

Regjia: Agon Myftari

Luajnë:
Rebeka Qena
Adrian Morina
Armend Ismajli
Besnik Krapi

„Në autobusin numër 4…gjatë kohës së luftës në Prishtinë…një i ri i moshës 26 vjeçare…në fermerka dhe në fanellë të zezë… Në afërsi të hotelit “Union”… plumbi i snajperit e thyen xhamin… dhe e qëllon të riun në qafë… Një zonjë e veshur në të bardhë, e cila qëndronte pranë tij fillon të bërtas. Kur e sheh gjakun në këmishën e vet i bie të fikët… Dy orë më vonë… ajo është parë sërish te Xhamia e madhe… në afërsi të kafenesë “Romantika” por kësaj radhe në shoqëri të një shoqe më të re nga mosha…e cila i thotë…”Unë ngandonjëherë e bëj edhe nga katërmbëdhjetë herë!” … Lëpin akullore… dhe buzëqesh

Ministri Krasniqi takoi drejtuesit e Filmit të Kosovës

admin — Wed, 18 Apr 2012 22:18:49 +0000

Ministri Krasniqi takoi drejtuesit e Filmit të Kosovës

Prishtinë, 17 Prill 2012

Unioni i Artistëve të Filmit të Kosovës është një nga mekanizmat e rëndësishëm që duhet të ketë rol të veçantë në zhvillim e kinematografisë së Kosovës si dhe lidhjes së bashkëpunimit me komunitete tjera të filmit në botë. Kështu tha sot ministri i Kulturës, Rinisë dhe Sportit, z. Memli Krasniqi, në takimin që ka pasur me kryetarin e Unionit të Artistëve të Filmit të Kosovës, z. Lirak Çelaj. Ministri Krasniqi vlerësoi se funksionalizimi i plotë i UAFK-së është hap i rëndësishëm për komunitetin artistik dhe në përgjithësi për jetën kulturore në vend. Ai premtoi mbështetjen e plotë të MKRS-së në planet e Unionit si dhe tha se në çdo fazë, sidomos në përgatitjen e legjislacionit për kinematografi, UAFK-ja do të jetë partneri kryesor. Ai e njoftoi z. Çelaj me punën që është bërë në ndryshimin e Ligjit për Kinematografi, duke thënë se tashmë po pritet që një ekspert ndërkombëtar të japë rekomandimet e veta dhe më pas draft-ligji të jetë në diskutim bashkë me kryesinë e Unionit por edhe më gjithë komunitetin artistik në vend. Ministri deklaroi se tashmë kultura dhe komuniteti artistik është i pavarur në punën e vet dhe se MKRS është vetëm një ndihmues dhe lehtësues i tyre. Ministri Krasniqi e ka njoftuar kryetarin e UAFK-së edhe me zhvillimet tjera për kulturë, çështje që kanë të bëjnë me teatrin, subvencionimin e projekteve kulturore, si dhe plane tjera në këtë drejtim.
Nga ana e tij, kryetari i UAFK-së, z. Lirak Çelaj, e njoftoi ministrin Krasniqi me punën që po bën kryesia e re e Unionit, duke thënë se ka një entuziazëm të madh tek anëtarët që të punohet edhe më shumë, dhe të jenë një shembull i mirë i organizimit të artistëve. Ai vlerësoi mbështetjen që MKRS ka dhënë për filmin dhe gjithë projektet kulturore. Më tutje, Çelaj shtoi se UAFK-ja do të jetë gjithnjë në gatishmëri që të japë kontributin e vet për zhvillim edhe më të madh të kinematografisë, si në aspektin e përgatitjes se infrastrukturës ligjore, funksionimit institucional si dhe lidhjes së bashkëpunimit me vendet tjera.
Ministri Krasniqi dhe z. Çelaj u pajtuan të jenë në komunikim dhe koordinim të vazhdueshëm në projektet e ardhshme që do të ketë komuniteti artistik.

Promovohet guida arkeologjike dhe video-spoti

admin — Fri, 03 Feb 2012 19:31:36 +0000

Promovohet guida arkeologjike dhe video-spoti

Prishtinë, 18 Prill 2012

Ministri i Kulturës, Rinisë dhe Sportit, z.Memli Krasniqi, tha se institucionet përgjegjëse duhet të përkushtohen për të ngritur një frymë të mirë pune dhe përgjegjësie që kanë për të siguruar kështu një mbrojtje dhe promovim më të mirë të trashëgimisë kulturore të Kosovës.

Ai i bëri këto komente në ceremoninë e shënimit të Ditës Ndërkombëtare të Trashëgimisë, më ç’rast është promovuar edhe Guida Arkeologjike e Kosovës, e përgatitur nga Instituti Arkeologjik i Kosovës me mbështetje të MKRS-së, e po ashtu është promovuar edhe video-spoti sensibilzues dhe promovues për trashëgiminë kulturore. Guida është botuar në tri gjuhë, shqip, serbisht dhe anglisht, ndërkaq video- spoti është në shqip dhe serbisht.

Ky aktivitet është mbajtur në Muzeun e Kosovës, ku kanë marrë pjesë edhe përfaqësues të institucioneve vendore e ndërkombëtare. Në fjalën e tij, ministri Krasniqi vlerësoi se guida dhe video-spoti promovues janë një hap domethënës për dokumentim dhe promovim të trashëgimisë. Ai tha se edhe në të ardhmen e afërt do të ketë forma të tjera të prezantimit të trashëgimisë kulturore, si asaj monumentale, arkeologjike dhe shpirtërore.

Ministri Krasniqi shtoi se gjatë vitit të kaluar dhe këtë vit ka pasur mjaft të arritura në këtë segment, por shtoi se duhet edhe më shumë angazhim. “Përkushtim i yni i veçantë, flas këtu për të gjitha institucionet, duhet të jetë krijimi i një fryme të mirë pune dhe përgjegjësi të madhe për t’i kryer detyrat që kemi. Një frymë e tillë padyshim që do të krijojë një qasje më të lehtë ndaj sfidave me të cilat përballemi. Ne tashmë jemi në hartim të një kornize të qartë ligjore, gjë që ka munguar deri tash, dhe e cila do të krijojë një përgjegjësi dhe fushëveprim të qartë të institucioneve karshi trashëgimisë kulturore”, tha ai. Ministri shtoi se në të kaluarën por edhe tash në qarqe të caktuara, synohet që diversiteti kulturor i Kosovës të shërbejë si pikë ndarëse. “Ne duhet që në fakt të ndjekim të kundërtën e kësaj, duke e parë diversitetin kulturor, fetar dhe kombëtar, si një pasuri të përbashkët që na afron me njëri-tjetrin. Trashëgimia, pa dallim, duhet të ruhet e të promovohet nga të gjithë, pasi edhe këto që ne ndërtojmë e krijojmë sot, të nesërmen do të jenë pjesë e trashëgimisë sonë. Në këtë rrafsh, duhet që tek gjeneratat e reja të mbjellim frymën e respektit për të kaluarën e popullit tonë”,
tha më tej ai. Ministri ndërkaq vlerësoi angazhimin që në kurrikulat mësimore të jetë edhe trashëgimia kulturore.

Të arriturat deri tash, ministri Krasniqi tha se janë edhe si rezultat i një ndihme të madhe që kanë dhënë partnerë të shumtë, ndërkombëtarë e vendorë. Me këtë rast, ai ka ndarë mirënjohje për Ambasadën Italiane në Kosovë, Ambasadën Amerikane, Këshillin e Evropës, Zyrën Ndërlidhëse të Komisionit Evropian, OSBE-në, Agjencinë Turke për Koordinim dhe Zhvillim, CHWB-në, IRD-në dhe Interssos.

Ndërkaq, drejtori i Institutit Arkeologjik të Kosovës, Enver Rexhaj, foli për punët që ka bërë ky institucion, si dhe për planet që ka për të ardhmen. Ai shtoi se është e rëndësishme që nga MKRS ka një mbështetje të madhe për punë kërkimore dhe shkencore.